lundi 12 mars 2012

اريال اريال !!!!


وأنا إنوقف في الكرهبة ونستوي فيها  طلعلي سي وخينا كيف العبيثة من حيث لا أدري وقف قدامي وقالي :
 اريال اريال !!!!
يا ولدي أنا اريال متاعك ؟ وراية حيط !!! باش ادخلني في حيط ؟
استوي العجلة واريال !!!!
يا ولدي إنزيد إنوخر ندخل في حيط يهديك !!!!
الحيط إشاعة وخر وآش إيهمك واستوي العجلة !!!! 
يا ولدي ابعد من قدامي وسيبني نستوي كرهبتي وحدي !!!
خليني نخدم خدمتي ياخي تعرف خير مني ؟ قتلك اريال !!!
نعن بو هنهار الكلب يا ولدي الحيط قد راسك ورايا يزيني قالوا اريال تحب تفشخلي الكرهبة ؟
الكرهبة موش مهمة المهم "العجلة" إستواهى مليح ورد بالك ادورها على "اليسار" ووخر وما تعطلنيش خليني نخدم خدمتي!!! أنا حطوني هوني ولاد الحومة نستوي في الكراهب
نعن بوك وبو ولاد الحومة إلي حطوك ماهم بهايم كيفك !!!!!
اه انتي ضاهر فيك تابع المؤامرة متاع الحومة "اللوطانية" إلي احبوا إحطو لعصا في العجلة !!!! يا بالحرام اريال !!!!! 
تعرفش كيفاش؟ هاني سكرت الكرهبة وهبطت وأعلى ما في خيلك اركبوا إنت وولاد حومتك !!!
آه هذا وقيل إعتصام  !!!تعرف آخر واحد كافر عمل إعتصام  صاحبي "قشورو" آش قالوا ؟ قالوا إنززرك نصلبك و ننفيك وقالهالو وأولاد حومتو يغزرو يا صاحبي!!!!
أية ملا هاني معتصم وجيب ولاد حومتك وقشورو صاحبك تو تلقاني في بطحة محمد علي الحامي أنا وأولاد الحومة عرفتها الحومة يا بو لحية ؟ وأعمل مجهودك!!!!
أنا هكاكة ونسمع كان في شكون إيعيطلي ريشة يا ريشة ...يا ريشة فيق إنهار راح برى اخدم على روحك !!!! حليت عينيا وفرحت إلي البركوس الملتحي متاع اريال طلع مجرد كابوس!!!!! حليت موزاييك نلقى أمين جارة يندب فيهم على حالة لبلاد ولعباد وتفكرت إلي إذا كان المسهول متاع الباركينغ كان باش ادخلني أنا في حيط ببهامتو المسؤولين السياسيين باش ادخلوا شعب كامل في حيط ببهامتهم وتغفيسهم ومستوا الحنكة السياسية متاعهم التي لا تتجاوز السنة التحضيرية !!!! 

  اريال يا شعب اريال وما تاقفو كان كيف تسمعوا شترطاف!!!!!!! 

2 commentaires: